May daku nga ikabugal ang banwa sang Sara matapos nga pormal nga mabaton ang ila una gid nga Cultural Inventory Book sa opisyal nga paglunsar sang 100 ka bulto sang The Cultural Inventories of Panay and Guimaras nga ginhiwat sang Hunyo 19, 2026 sa UPV Auditorium, University of the Philippines Visayas sa Iloilo City.
Paagi sa Municipal Tourism Division, nagpasakop ang LGU-Sara sa nasambit nga programa kag nangin kabahin sang mga lokal nga panguluhan nga nagbaton sang ila kaugalingon nga cultural inventory publication.
Ang libro nagatipon sang mga importante nga impormasyon parte sa kultura, tradisyon, kasaysayan, kag mga kabilin sang banwa sang Sara agud mapreserbar kag mapasa ini sa palaabuton nga mga henerasyon.
Ginkalipay gid ni Mayor Jon N. Aying ang ini nga kadalag-an bangud sa una nga tion, may yara na sang opisyal nga Cultural Inventory Book ang Banwa sang Sara, nga nagapakita sang manggad nga kultura kag identidad sang mga Saranhon.
Ngaa dako ini nga bulig?
Ang ini nga data-gathering indi lamang basta listahan. Ini ang mangin sadsaran sang aton mga polisiya, dugang nga pagpabaskog sang lokal nga turismo, kag opisyal nga basehan para sa “Local Cultural Profile” sang banwa. Ini ang aton mabilin nga legasiya—isa ka paagi agud masiguro nga sa tunga sang modernisasyon, ang durog kag buhi nga kultura sang Sara indi gid mahanaw kag magapabilin nga dako nga bugal sang masunod nga mga henerasyon.
