Ginhatagan sang Bureau of Fire Protection (BFP) Region VI sang Plaque of Recognition si Municipal Mayor Jon N. Aying sang Municipality of Sara bilang pagkilala sa iya invaluable support kag padayon nga pagbulig sa misyon sang BFP para sa fire safety kag public protection.
Ang pagkilala ginhatag bilang kabahin sang 35th BFP Anniversary Celebration nga ginhiwat sang Agosto 27, 2026 sa Diversion 21 Hotel, Iloilo City, nga may tema nga “Tatlong Dekada at Limang Taon ng Serbisyong Tapat at Maaasahan: BFP sa Bagong Pilipinas.”
Suno sa plaque, ginapasalamatan nila ang suporta ni Mayor Aying, lakip ang donasyon, pag-acquire sang fire truck, kag pagpondo para sa repairs kag improvements sang Sara Fire Station. Ini nga mga inisyatibo nakabulig sa pagpalig-on sang fire service capabilities kag sa mas epektibo nga pagpatuman sang mandato sang BFP sa pagpanalipod sang kabuhi kag propiedad.
Ang award isa ka pagpamatuod nga ang pagbinuligay sang LGU kag BFP importante sa pagpatuman sang mas handa, mas episyente kag mas luwas nga serbisyo para sa mga Saranhon.
