Oktubre 24, 2026— Ginhiwat subong nga adlaw sa Sara National High School (SNHS) Gymnasium ang Fifth Congressional District Secondary Schools Press Conference, nga nagatuyo sa pagpauswag sang abilidad, talento, kag kahibalo sang mga estudyante sa patag sang campus journalism.
Gin-host sang Sara National High School ang nasambit nga kahiwatan nga ginlakipan sang mga mensahe halin sa mga opisyal sang lokal nga panguluhan kag Department of Education (DepEd).
Kabahin sang programa ang pagpresentar sang mga partisipante, orientation, kag nagkalain-lain nga kompetisyon sa campus journalism, nga nagahatag sang kahigayunan sa mga pamatan-on nga mapakita ang ila ikasarang sa responsable kag matuod nga pagpahayag sang impormasyon.
Ang kahiwatan nagapakita sang padayon nga pagsuporta sa paghulma sang mga pamatan-on bilang responsable, kritikal, kag may integridad nga mga mamahayag sang palaabuton.
