Isa ka importante nga kadalag-an sa kampanya batok sa iligal nga droga ang naangkon sang banwa sang Sara matapos nga opisyal nga gindeklarar sang Philippine Drug Enforcement Agency (PDEA) nga drug-free ang anum ka barangay sa banwa.
Ang mga barangay nga nakabaton sang nasambit nga pagkilala amo ang Latawan, Muyco, Malapaya, Arante, Padios, kag Salcedo, sa ginhiwat nga 70th Deliberation sang Regional Oversight Committee on the Barangay Drug Clearing Program sang Oktubre 27, 2026, sa Liga Hall, Calinog, Iloilo.
Ini nga pagkilala nagapakita sang mabaskog nga kooperasyon kag pagbinuligay sang mga opisyal sang barangay, lokal nga panguluhan, kapulisan, PDEA, kag komunidad sa padayon nga pagpakig-away batok sa iligal nga droga.
Apang, ginapahanumdom nga ang pag-angkon sang drug-cleared status may kaangot nga responsibilidad sa pagmentinar sang kalinong kag seguridad paagi sa padayon nga pagbantay, edukasyon, kag pagpatuman sang mga programa batok sa iligal nga droga.
Ang kadalag-an sang anum ka barangay ginapaabot nga mangin inspirasyon sa iban pa nga barangay sa pagpalig-on sang ila mga tikang padulong sa mas hilway, malinong, kag drug-free nga komunidad.
