Oktobre 27, 2026- Isa naman ka dungog ang naangkon sang Local Government Unit (LGU) sang Sara kag Rural Health Unit-Sara matapos makuha ang 2nd Place – Excellence Award sa idalom sang AD MAIORA (Toward Greater Achievements), YAKAP and GAMOT Cluster III, para sa mga banwa nga may populasyon nga 50,001 tubtob 75,000.
Ang pagkilala ginpadangat sa PhilHealth VI YAKAP and GAMOT Summit 2026 nga ginhiwat sang Oktubre 27, 2026, sa Diversion 21 Hotel, Iloilo City.
Ginkilala ang LGU-Sara kag RHU-Sara bangud sang maayo nga pagpatuman sang PhilHealth YAKAP kag GAMOT Programs, lakip ang pagpalapad sang PhilHealth membership coverage, pagpatuman sang First Patient Encounter (FPE), kag pagpaayo sang akses sang mga pumuluyo sa kinahanglanon nga bulong kag serbisyo panglawas.
Dugang pa, nakabaton man ang LGU-Sara sang Token of Appreciation kag Certificate of Recognition bilang pagkilala sa padayon nga suporta kag dedikasyon sini sa pagpalig-on sang Universal Health Care.
Ang ini nga kadalag-an nagapakita sang padayon nga pagtinguha sang LGU-Sara nga mapalambo ang kalidad sang serbisyo panglawas para sa kaayuhan sang tagsa ka Saranhon.
