Isa na naman ka dungog kag kadungganan para sa Banwa sang Sara matapos nga ginpasidunggan si Mayor Jon “Onick” N. Aying sang Gawad Katangi-Tanging Lingkod-Bayan (Distinguished Public Servant Leadership Award) sa ginhiwat nga 2nd Gawad Pamana ng Pluma International Awarding Ceremony sang Mayo 31, 2026 sa Hotel Supreme Convention Plaza, Baguio City.
Ang nasambit nga pagkilala ginhatag bangud sang iya mapinadayunon nga pagpanguna sa pagserbisyo publiko, maayo nga pagdumala, matarong nga pamatasan sa liderato, kag positibo nga kontribusyon sa pag-uswag sang komunidad. Ang award nagapakita sang pagpasalamat kag pagkilala sa iya dedikasyon bilang alkalde sang Sara nga nagahatag inspirasyon sa pumuluyo pinaagi sa responsable kag matutom nga pagserbisyo.
Sa iya acceptance speech, ginrepresentar ni Mayor Aying indi lamang ang banwa sang Sara kundi pati man ang probinsya sang Iloilo, samtang ginpabutyag niya ang importansya sang matinlo kag masinadyahon nga pagdumalahan sa katawhan.
Ang awarding ceremony gin-organisar sang Kapisanan ng mga Filipinong Awtor at Manunulat sa Pilipinas, Inc. (KAFAMPI), M.E. Publications, kag ASSETT of the Philippines, Incorporated. Ang aktibidad naghatag pagkilala sa mga indibidwal nga nagpakita sang talalupangdon nga kontribusyon sa literatura, edukasyon, kag serbisyo publiko sa pungsod.
Dako nga kadungganan ini para sa Banwa sang Sara, nga nagapamatuod nga ang matuod nga liderato kag sinsero nga pagserbisyo sa katawhan wala nagaagi lang nga indi mahatagan sang igtalupangod. Ang pag-daug ni Mayor Jon N. Aying bilang Gawad Katangi-Tanging Lingkod-Bayan Awardee isa ka inspirasyon sa tanan nga padayon nga magserbisyo nga may integridad, dedikasyon kag gugma sa banwa.
“Isa ini ka pagpasidungog indi lang para sa akon kundi para sa bug-os nga pumuluyo sang Sara nga padayon nga nagasuporta kag nagapakigbato para sa mas maayo nga palaabuton sang aton banwa,”– Mayor Jon N. Aying.
