Naghatag sang cash incentives ang Iloilo Provincial Government sa mga senior citizens sang banwa sang Sara bilang pagkilala sa ila malawig nga kabuhi kag importante nga kontribusyon sa komunidad, Hunyo 2, 2026.
Sa amo nga programa, may kabug-usan nga 74 ka mga octagenarian (85 anyos) kag nonagenarian (95 anyos) nga nakabaton sang tig-Php5,000.00 nga cash incentive gikan sa probinsyal nga panguluhan. Samtang, apat ka mga centenarian nga nakaabot sa edad nga 100 anyos ang nakabaton naman sang tig-Php 20,000.00 cash incentive bilang espesyal nga pagkilala sa ila mabaskog nga pangabuhi kag inspirasyon sa masunod nga henerasyon.
Ang ini nga programa nagapakita sang padayon nga suporta kag pag-atipan sang Iloilo Provincial Government sa kaayuhan sang mga senior citizens, ilabi na sa mga nakaabot sang mataas nga pang-idaron. Daku man ang pagpasalamat sang mga benepisyaryo kag ila mga pamilya sa bulig nga ila nabaton.
Ang paghatag sang cash incentives isa ka pamaagi sang gobyerno probinsyal sa paghatag importansya kag pagpasidungog sa mga katigulangan nga nagserbi bilang haligi sang ila pamilya kag komunidad sa sulod sang madamo nga mga tinion.
