Sa pihak sang mga pagtilaw nga aton maagyan samtang kita nagakabuhi diri sa kalibotan, ini aton gakalampuwasan basta indi lang kita madulaan sang pagsalig sa kataas-taasan. Parehas sang istorya ni Niel Cervantes ukon mas kilala bilang si “Nong Niel” nga nabun-ag sa Nueva Ecija, apang nakalab-ot diri sa banwa sang Sara bangud sa pag-upod niya sa iya abyan kag pagpasimpalad sang iya kapalaran.

Nag-istar siya sa Brgy. Ardemil sa madamo ka mga tinuig. Nangabuhi siya nga naga-isahon kag nag-trabaho man bilang mangunguma sa banwa sang Batad. Naga-tapas sya sang mais, naga-garab sang humay, kag nagaarado sa mga taramnan para lang maka-kita siya sang kwarta nga iya magamit sa iya pang-adlaw-adlaw. Apang nag-abot siya sa pinaka-daku nga pagtilaw sa iya kabuhi.

Nabulag si Nong Niel kag sa taga-adlaw nga nagalipas nadulaan siya sang paglaum nga makakita liwat. Asta, nagdesisyon siya nga magbalik sa Sara. Matuod-tuod gid man nga ang Saranhon daku ang gugma bangud sa pagbalik niya sa Sara, ginbuligan siya sang pila ka mga persona. Ginbuligan man siya nga makapangayo bulig sa MSWD-Sara. Sang nakita ni Mayor Jon Aying ang sitwasyon ni Nong Niel, gindesisyonan ini sang LGU-Sara nga buligan maoperahan. Ginpaistar siya sa Crisis Center sang banwa sang halos 3 ka tuig sang COVID-19 pandemic. May mga tawo nga nagatatap sa iya sa matang-adlaw nga mga hilikuton. Ginpabaskog man ang iya pagsalig nga siya makakita liwat sa maabot nga panahon.

Sa bulig sang LGU-Sara kag RHU-Sara, sang Nobyembre 2022, ang mata ni Nong Niel naoperahan kag siya makakita na. Pagkatapos niya maoperahan, ginhatagan siya sang trabaho sang LGU. Daku gid ang kalipay niya kay nakita niya liwat ang kasanag kag kaanyag sang ining kalibotan. Sa subong, si Nong Niel nagpuli sang nagligad lang gid nga semana sa Mindanao agud makita liwat ang iya pamilya.

Sa kadamo sang iya naagyan, kapaslawan nga nasalapuan, kag inagyan, wala siya nadulaan paglaum nga ang tanan iya malampasan. Sa bulig sang mga tawo nga may daku nga tagipusuon kag bukas nga mga palad, ginhatagan liwat sang kasanag ang iya kabuhi.

SARA GUGMA KO!

“DISCLAIMER: I hereby declare that I do not own the rights to the music/song used. All rights belong to the owner. No Copyright Infringement Intended.”