Ang Local Government Unit sang Sara nagapahibalo sa tanan nga paagi sa Executive Order No. 040, Series of 2026 nga ginpirmahan ni Mayor Jon N. Aying, opisyal nga ginadeklarar ang pagsaulog sang ika-25 nga Sulay Basya Festival 2026 sa banwa sang Sara, Iloilo halin Hunyo 10 tubtob Hunyo 24, 2026.
Ginaagda ang tanan nga mga opisina sang gobyerno, pribado nga institusyon, negosyo, eskwelahan, barangay, civic organizations, kag iban pa nga sektor nga magpakigbahin kag magsuporta sa nagkalain-lain nga aktibidad nga ginpreparar para sa sini nga selebrasyon.
Ang Sulay Basya Festival isa ka importante nga selebrasyon nga nagapakita sang manggaranon nga kultura, tradisyon, talento, kag pagkahiusa sang mga Saranhon. Paagi man ini sa pagpauswag sang turismo, pagpalig-on sang partisipasyon sang komunidad, kag pagbulig sa lokal nga ekonomiya.
Gani, ginapangabay ang tanan nga mga pumuluyo kag bisita nga mag-upod kag makigbahin sa mga aktibidad sang ika-25 nga Sulay Basya Festival, agud nga mangin masinadyahon kag madinalag-on ini nga handumanan para sa aton tanan.
Magsinadya kita kag magbinuligay para sa mas mabaskog kag mas masadya nga Sulay Basya Festival 2026!
