Nakabaton sang tig-Php 5,000.00 nga cash assistance ang kabug-osan nga 252 ka drivers sa banwa sang Sara paagi sa Cash Relief Assistance sang Department of Social Welfare and Development (DSWD), Abril 28, 2026.
Ang mga benepisyaryo amu ang mga na-identify nga drivers sang tricycle nga rehistrado kag may permit mag-operate sa ila Local Government Unit (LGU).
Ginpatigayon ang pagpanagtag sang ayuda sang DSWD Field Office VI, samtang ginbuligan kag gin-asisteran ini sang Municipal Social Welfare and Development Office (MSWDO) sang banwa.
Suno sa DSWD, ang nasambit nga cash assistance ginhatag bilang bulig sa mga drivers nga naapektuhan sang pagsaka sang presyo sang gasolina ukon krudo, nga ginapatihan nga resulta sang nagakatabo nga gyera sa Middle East.
Ang programa nagalaum nga makahatag sang gamay nga bulig pinansyal agud mabuligan ang mga drivers sa pag-atubang sang adlaw-adlaw nga panginahanglanon sa tunga sang nagataas nga gasto sa transportasyon.