Madinalag-on kag puno sang kasadya nga ginbuksan sang Lokal nga Panguluhan sang Sara ang 25th Sulay Basya Festival sang Hunyo 10, 2026, nga ginatam-an sang madamo nga mga Saranhon kag bisita nga nag-upod sa pagsaulog sang kultura, tradisyon kag paghiliusa sang banwa.
Nagsugod ang selebrasyon sa Sara Municipal Plaza pinaagi sa nagkalain-lain nga mga presentasyon gikan sa mga partisipante nga pampubliko kag pribado nga high school sa banwa. Ang ila mga saot kag pasundayag nagpakita sang talento sang kabataan kag sang manggaranon nga kultura kag tradisyon nga ginapanubli sang mga Saranhon sa masunod nga henerasyon.
Ginpatigayon man ang Mass Dance nga gin-updan sang mga estudyante, opisyales kag pumuluyo antes nagsugod ang tradisyunal nga Sadsad, nga naglibot halin sa Sara Municipal Plaza pakadto sa Sara Activity Center.
Ang masadya nga parada naghatag sang kabuhi sa kadalanan samtang ginapakita ang espiritu sang paghiliusa kag kasadyahan nga amo ang kinaiya sang Sulay Basya Festival.
Pag-abot sa Sara Activity Center, ginpatigayon ang Ribbon Cutting Ceremony kag ang opisyal nga pagbukas sang Food Kiosk kag Bazaar, nga naghatag sang oportunidad sa mga lokal nga negosyante nga mapakita kag mabaligya ang ila mga produkto sa nagadamo nga mga bisita sang pista.
Nagpadayon ang kasadyahan sa gab-i pinaagi sa makahalinang nga Fireworks Display nga nagpasanag sang kalangitan sang Sara kag gin-updan sang isa ka Live Band Performance nga naghatag sang dugang nga kalingawan sa tanan nga nagtambong.
Ang pormal nga pagbukas sang 25th Sulay Basya Festival ginpangunahan ni Mayor Jon N. Aying, nga nagpahayag sang opisyal nga deklarasyon sang festival.
Sa iya deklarasyon, nagsiling ang alkalde:
“By virtue of the authority vested in me as Municipal Mayor of Sara, Iloilo, I hereby declare the 25th Sulay Basya Festival officially open.”
Sa iya mensahe, ginpasalamatan ni Mayor Aying ang tanan nga nagbulig sa preparasyon kag pagpatigayon sang festival, ilabi na ang mga komite, mga eskwelahan, barangay officials, sponsors kag mga pumuluyo nga padayon nga nagasuporta sa mga programa sang banwa.
Ang ika-25 nga Sulay Basya Festival wala lamang nagasimbulo sang kasadyahan kundi nagapakita man sang madalom nga paghigugma sang mga Saranhon sa ila kultura, tradisyon kag identidad, samtang ginapalig-on ang paghiliusa kag pag-uswag sang komunidad.
