Ginhiwat sang Municipality of Sara ang selebrasyon sang 52nd Nutrition Month subong nga Hulyo 31, 2026 sa Sara Activity Center nga may tema, “Nutrisyon at Kalikasan, Ating Pangalagaan!”
Gintambungan ini sang mga opisyal sang banwa, mga empleyado sang Rural Health Unit, Barangay Nutrition Scholars (BNS), Barangay Health Workers (BHW), Child Development Workers (CDW), mga daycare learners, kag iban pa nga mga stakeholders sa sektor sang ikaayong-lawas kag nutrisyon.
Sa programa, naghatag sang mga mensahe sanday Mayor Jon N. Aying, Vice Mayor Ryan S. Zerrudo, kag SB Member Mychel M. Saber, Chairman sang Committee on Health, nga nagpalab-ot sang ila suporta sa mga programa nga nagapalig-on sang maayong panglawas, husto nga nutrisyon, kag pag-atipan sang aton kalikasan.
Kabahin man sang selebrasyon ang NutriCamp Bulilit, Cooking Contest, Zumba Contest, kag ang pagpili sang Best Gulayan sa Barangay nga gintambungan sang 42 ka barangay sang banwa.
Ginpasidunggan man ang mga nagdaog kag mga indibidwal nga nagpakita sang dedikasyon sa pagpangabudlay para sa mas himsog kag masustener nga komunidad.
Ang selebrasyon nagapakita sang padayon nga paninguha sang LGU Sara nga mapalapnag ang importansya sang maayo nga nutrisyon kag pag-amlig sa kalikasan agud makab-ot ang mas himsog kag mas malambuon nga palaabuton para sa tagsa ka Saranhon.
SARA GUGMA KO!