Nagtililipon ang mga mahilig kag eksperyensyado nga manughampang sang chess gikan sa nagkalain-lain nga probinsya sang Rehiyon VI sa ginpatigayon nga 7th Sara Chess Club Tournament, isa sa mga tampok nga aktibidad sang pagsaulog sang ika-25 nga Sulay Basya Festival sang nanligad nga Hunyo 14, 2026.
Ginhiwat ang torneo sa Brgy. Apologista Gymnasium, kun sa diin nag-abot ang mga partisipante nga may isa ka tumong—ang ipakita ang ila kahibalo, disiplina kag talento sa hampang nga chess.
Nagbukas ang kompetisyon sa tatlo ka kategorya nga amo ang 12 and Under, 17 and Under, kag Open Dalawahan-1975, nga naghatag sang kahigayunan sa mga kabataan kag mga beterano nga manughampang nga magbinakbakan sa ibabaw sang chessboard.
Sa tagsa ka pag-uswag sang piyesa, makita ang konsentrasyon kag determinasyon sang mga players nga naghalin pa sa lain-lain nga lugar sang Western Visayas agud makigbahin sa prestihiyoso nga torneo. Nagdala man ini sang kahigayunan para sa pag-ilinaway sang eksperyensya, pagpakig-amigo kag pagpalig-on sang sportsmanship sa tunga sang mga partisipante.
Labaw sa kompetisyon kag mga premyo nga naghulat sa mga madaug, nangin entablado man ang torneo para sa pagpasanyog sang chess bilang isa ka isport nga nagapalambo sang kritikal nga panghunahuna, disiplina kag pagkamainalamon sang mga kabataan.
Ang 7th Sara Chess Club Tournament isa ka pagpamatuod nga bisan sa tunga sang selebrasyon kag kasadya sang pista, may lugar gihapon para sa mga hilikuton nga nagapatigayon sang kahibalo, pag-amityay kag pagpalambo sang talento sang pumuluyo.
