Napuno sang kalipay kag inspirasyon ang Camp Bulilit 2026 sang ginbisita kag gin-attendan ini ni Mayor Jon N. Aying sa Malapaya Covered Gym, Brgy. Malapaya, Sara, Iloilo sang Marso 5, 2026.
Kabahin sang programa sa mga learners amu ang dance activity, storytelling sang mga miyembro sang PYAP Officers, coloring, nap time sa ila nga mga tent, kag amazing race games.
Wala naman nagpaulihi si Mayor Aying sa storytelling activity para sa mga kabataan. Sa iya istorya parte kay Ba-o kag Matsing, makita sa mga ngisi kag mata sang mga kabataan ang kalipay samtang sila nagapamati sa iya istorya—istorya nga indi lang nagahatag kasadya kundi nagatanum man sang paglaum kag inspirasyon sa ila.
Ang Camp Bulilit gin-attendan sang mga Child Development Workers, learners, kag parents halin sa nagkalain-lain nga Child Development Centers (CDC) sang Malapaya, lakip ang Sitio Capinayan, Aposaga, Sap-ong, Aguirre, Juaneza, Dapog, Domingo, Puruguan, Bato, Tady Proper kag Sitio Basad.
