Indi lamang isa, kundi duha ka prestihiyoso nga pagkilala ang naghatag sang dugang nga kadungganan sa Banwa sang Sara matapos nga ginpasidunggan si Municipal Mayor Hon. Jon N. Aying kag ang Lokal nga Panguluhan sang Sara sa 2026 Philippines Choice Awards, bilang pagkilala sa maayo nga pagpanguna, epektibo nga pagdumala, kag pagpatuman sang mga programa kag proyekto nga nagahatag sang benepisyo sa mga pumuluyo. Ini ginhiwat sang Nobyembre 7, 2026 sa The Manila Hotel.
Ginpasidunggan si Mayor Aying bilang OUTSTANDING MAYOR OF THE YEAR, samtang ang Banwa sang Sara naman ang nag-angkon sang OUTSTANDING LGU IN TERMS OF PROGRAMS AND PROJECTS IMPLEMENTED, duha ka pagkilala nga nagapakita sang dedikasyon sang lokal nga administrasyon sa paghatag sang dekalidad nga serbisyo publiko.
Ang ini nga mga kadungganan nagapamatuod nga ang pagpanguna nga may klaro nga direksyon, matinud-anon nga pagserbisyo, kag hugot nga pagpanikasog para sa kaayuhan sang katawhan nga nagdala sang positibo nga pagbag-o kag pag-uswag sa komunidad.
Sa idalom sang administrasyon ni Mayor Aying, padayon nga ginapabaskog naton ang mga programa kag proyekto nga nagasabat sa kinahanglanon sang mga Saranhon, samtang ginahatagan sang importansya ang pag-uswag sang imprastruktura, serbisyo sosyal, kag iban pa nga mga inisyatibo para sa mas maayo nga palaabuton sang banwa.
Labaw sa personal nga kadungganan sang alkalde, ang ini nga kadalag-an isa ka simbolo sang paghiusa, dedikasyon, kag pagbinuligay sang mga opisyal, empleyado sang lokal nga panguluhan, kag sang bug-os nga katawhan sang Sara.
Ang duha ka pagkilala indi lamang mga tropeyo nga ginbaton, kundi mga simbolo sang responsibilidad nga padayon nga magserbisyo, magpangunahan, kag magpatuman sang mga programa nga may matuod nga epekto sa kabuhi sang mga pumuluyo.
PADAYON SA PAG-USWAG, PADAYON SA PAGPASIDUNGOG!
