Ginpatigayon sang Sara Municipal Police Station, kaupod ang Municipal Disaster Risk Reduction and Management Office (MDRRMO), Bureau of Fire Protection (BFP), kag iban pa nga mga ahensya, ang Province-wide Ceremonial Simultaneous Posting of Posters kag Official Launching sang Unified 911 Emergency Hotline sang Hulyo 17, 2026 sa Sara National High School.
Kabahin sang programa ang pagpresentar sang Unified 911 Hotline nga ginpangunahan ni PLT Rick Adrian P. Navarro, DCOP, agud mapalapnag ang importansya sang isa ka emergency hotline nga mahimo tawagan sang publiko sa tion sang kalamidad, aksidente, sunog, kag iban pa nga emerhensya.
Naghatag man sang mensahe sanday PCINSP. Edwin B. Aguenido (Ret.), Head sang MDRRMO, SFO4 Ricky C. Dula-Ogon, Acting Municipal Fire Marshal, Mayor Jon N. Aying, kag PLT Brett G. Balopiños, OIC sang Sara MPS, nga nagpabutyag sang ila suporta sa inisyatibo nga nagatinguha nga mapadasig ang pagresponde kag mapabakod ang koordinasyon sang kapulisan, bombero, MDRRMO, kag iban pa nga responder.
Sa paglunsar sang Unified 911 Emergency Hotline, ginapangabay ang tanan nga Sarahanon nga gamiton ini sa responsable nga pamaagi agud masiguro ang madali kag episyente nga pagresponde sa nagkalain-lain nga emerhensya.
Isa ka tawag lamang sa 911, ang nagakaigo nga ahensya ang dayon nga maaksyon.
