Nabaton na sang ika-duha nga Saranhon nga nakadangat sang edad nga 101 anyos (subong nga tuig) ang iya Centenarian Gift nga Php100,000.00 nga nagikan sa national government paagi sa pagbulig nga maproseso sang Lokal nga Gobyerno sang Sara kag Department of Social Welfare and Development – Region 6.

Si Nanay VIRGILIA C. CASAMAYOR natawo sang Marso 10, 1922 kag siya ang nakadangat sa edad nga 101 subong nga tuig. Siya tumandok sang Barangay Lanciola, Sitio Pagaypay, Sara, Iloilo. Nagapuyo siya sa iya balay kaupod ang iya mga kabataan. Gane, tuman ang kalipay niya kag sang iya kabataan nga nabaton na niya ang centenarian cash kay daku gid ini ang bulig sa pagbakal vitamins kag iban pa nga kinahanglanon niya.

Para sa ihibalo sang tanan, ang Centenarian Gift mabaton sang tanan nga mga Pilipino nga makadangat sa edad nga 100. Gin-implementa ini paagi sa Republic Act 10868 kag ang ini nga cash incentives naghalin mismo sa national government paagi sa DSWD, “tax free cash benefit”.

Gusto mo man bala makadangat sa edad parehas kay Nanay Virgilia? Mag-healthy lifestyle ka.

SARA GUGMA KO!