Ginpasidunggan si Mayor Jon N. Aying kag LGU-SARA sang Department of Justice – Parole and Probation Administration (DOJ-PPA) Regional Office VI bilang pagkilala sa wala untat nga suporta kag pagpakigbahin sang Lokal nga Panguluhan sang Sara sa mga programa kag serbisyo sang ahensya.
Ang pagkilala ginpatigayon sa Golden Anniversary Celebration sang DOJ-PPA sang Hulyo 23, 2026 sa Grand Xing Hotel, Iloilo City, nga nagtimaan sang ika-50 ka tuig sang pag-alagad sang ahensya sa pungsod.
Sa imbitasyon nga ginpadala sang DOJ-PPA, ila ginpabutyag nga ang LGU Sara isa sa mga mabakod nga upod sang ahensya sa pagpalig-on sang community-based corrections programs, nga nagabulig sa rehabilitasyon kag pagbalik sang mga kliyente sa komunidad bilang responsable kag produktibo nga mga pumuluyo.
Ang ini nga pagkilala nagapakita sang padayon nga dedikasyon sang administrasyon ni Mayor Jon N. Aying sa pagpatuman sang mga programa nga nagapalig-on sang hustisya, rehabilitasyon, kag kalinong sa banwa sang Sara.
Isa ini ka dungog indi lamang para sa Lokal nga Panguluhan, kundi para man sa bug-os nga banwa sang Sara, nga padayon nga ginakilala bilang isa ka masaligan nga katuwang sa paghatag sang episyente kag makahuluganon nga serbisyo publiko.
