Isa naman ka kadungganan ang nabaton sang Banwa sang Sara matapos nga madala si Mayor Jon N. Aying sa Top 15 Municipal Mayors sa Probinsya sang Iloilo nga may pinakamataas nga pagsalig kag positibo nga pagtamod sang publiko, base sa pinakaulihi nga RPMD “Boses ng Bayan” Index of Governance (IOG) Survey.
Nakarekord si Mayor Aying sang 73.4% Index of Governance (IOG) rating, nga nagbutang sa iya bilang ika-6 sa bug-os nga probinsya sang Iloilo. Siya man ang bugtong nga Municipal Mayor sang Ikalima nga Distrito sang Iloilo nga nakasulod sa Top 15 sang nasambit nga survey.
Nagapakita ini sang padayon nga pagsalig sang katawhan sa liderato ni Mayor Aying kag sa padayon nga pagpatuman sang Lokal nga Panguluhan sang Sara sang mga programa kag serbisyo nga nagatubang sa mga kinahanglanon sang pumuluyo.
Ang ini nga pagkilala isa ka pamatuod sang padayon nga paninguha sang LGU-Sara sa paghatag sang matutom, episyente, kag responsable nga serbisyo publiko para sa kaayuhan kag kauswagan sang bug-os nga banwa.
Ang survey sa bug-os nga Probinsya sang Iloilo ginpatigayon halin Abril 1 tubtob Abril 8, 2026, nga nagatabon sa una nga quarter sang tuig. Sa kinatibuk-an, 5,000 ka rehistrado nga botante halin sa nagkalain-lain nga banwa kag siyudad sa Probinsya sang Iloilo ang random nga ginpili kag ginpanugyanan sang interbyu, nga nagarepresentar sa tanan nga socioeconomic nga sektor sang komunidad. Ang survey may ±1% margin of error sa 95% confidence level.
Ang provincial assessment sa Iloilo kabahin sang pungsodnon nga “Boses ng Bayan” nga programa sang RPMD Foundation Inc., isa ka independente kag wala gin-komisyon nga inisyatibo sa panukib bahin sa opinyon sang publiko kag pagdumala sang gobyerno. Paagi sa mga ebidensya nga nagabase sa pagtakos sang pagsalig kag performance, ang programa nagahatag sang patas kag obhetibo nga pagtasa sa resulta sang pagdumala kag sa aktuwal nga pagbatyag sang pumuluyo para sa kaayuhan sang mga pumuluyo kag mga opisyal sang gobyerno.
📷 via: Iloilo Metropolitan Times
