MGA HAMPANG NGA TAEKWONDO, TENNIS, KAG BOCCE GINHIWAT SA BANWA SANG SARA!
Posted on
Nag-umpisa na ang pa-indis-indis sang abilidad kag kaalam sang mga atleta nga taga-Quinto Distrito sa isport nga taekwondo, tennis, kag bocce sa banwa sang Sara. Mahibaloan nga ang Sara amu ang host sa nasambit nga isport.
Ang iban naman nga isport ginahiwat sa iban nga banwa kag ang LGU-Sara suportado ang transportasyon, pagkaon, kag bayu sang mga atletang-Saranhon.
Para sa aton ihibalo, ang taekwondo isa ka isport nga pangkombat nga naghalin sa pungsod sang Korea. Samtang, ang tennis naman isa sa mga pinakasikat nga isport sa bilog nga kalibotan kung sa diin ang mga taga-humalampang naga-gamit sang raket para malab-ot kag ibalik ang bola sa pihak sang net sa korte sang kontra. Dugang pa, nakahibalo bala kamo kung ano ang bocce? Ang bocce isa man ka pinaka-sikat nga isport sa bilog nga kalibotan. Isa ini ka hampang sang mga Italyano, kung sa diin gina-roll ang bocce ball sang humalampang sa pinakamalapit nga target nga bola. Ang Bocce bilang isa ka “Espesyal na Palarong Olimpiko” nga ginapasakupan sang mga SPED (Special Education) players nagahatag sa mga tawo nga may espesyal nga pagkinahanglan na maka-eksperensya sang ginatawag nga social contact kag makabatyag sang pagsalig sang ila kaugalingon nga kung kaya sang iban kaya man nila nga makibagbahin sa patag sang isport.
