Ginpasidunggan ang Municipality of Sara sa ginhiwat nga 2026 Health Excellence and Leadership (HEAL) Awards Ceremony sa Grand Xing Imperial Hotel, Iloilo City matapos ini nga mangin una nga Local Government Unit (LGU) sa probinsya sang Iloilo nga na-accredit bilang PhilHealth-Guaranteed and Accessible Medications for Outpatient Treatment (GAMOT) Provider, Hulyo 30, 2026.
Ang nasambit nga pagkilala nagapamatuod sang padayon nga pagpaninguha sang lokal nga panguluhan sa pagpalapnag sang de-kalidad, accessible, kag episyente nga serbisyo sa ikaayong-lawas para sa mga Saranhon.
Sa iya mensahe, ginpahayag ni Mayor Jon N. Aying ang iya pagpasalamat sa tanan nga nagbulig agud maangkon ang ini nga milestone. Gin-atributir niya ang kadalag-an sa dedikasyon kag mabinuligon nga pagbinuligay sang Municipal Department of Health, Municipal Pharmacy, mga healthcare workers, kag tanan nga kaangot nga opisina nga nagaserbisyo sa paghatag sang maayo nga serbisyo sa publiko.
Ginpabutyag man sang alkalde nga ang ini nga pagkilala indi lamang para sa LGU, kundi para sa bug-os nga pumuluyo sang Sara, kag isa ini ka inspirasyon agud padayon pa nga mapalig-on ang mga programa kag serbisyo sa sektor sang ikaayong-lawas.
Ang HEAL Awards nagahatag pagkilala sa mga lokal nga panguluhan nga nagapakita sang maayo nga liderato sa implementasyon sang mga programa sa panglawas, nga nagahatag sang kauswagan sa komunidad.
