Daku nga kadalag-an ang gin-angkon sang Munisipalidad sang Sara matapos ini makabaton sang Seal of Good Education Governance sa 2026 Washington Sycip National Education Summit. Ini isa ka prestihiyoso nga pagkilala sa lokal nga panguluhan nga may epektibo nga sistema sa pagdumala kag paghatag sang kalidad nga edukasyon sa komunidad.

Dugang pa, ika-tatlo na ini nga award nga aton nabaton gikan sa Synergeia Foundation, Inc.- nagapakita nga naga-hugpong ang LGU-Sara, manunudlo, ginikanan, kag estudyante nga padayon nga magpabaskog sa kalidad nga edukasyon para sa Kabataang-Saranhon.

Ang award ginahatag sa mga LGU nga maayo nga naga-organisa sang ila mga programa kag proseso sa basic education- lakip na ang aktibo nga Local School Board, functional nga School Governing Councils, kag mga inisyatibo nga naga bulig sa pagpaayo sang pagbasa, pagtuon, kag pagtapos sang mga kabataan sa elementarya.

Bangud sa mga programa nga naga suporta sa edukasyon, mas madamo nga kabataan sa Sara ang nakakatapos sang Grade 6, kag ginabuligan man ang mga kabataan nga mahina sa pagbasa agud mangin mas hilig sa pagtuon. Subong man, padayon ang munisipyo sa pag-invest sang pondo kag proyekto nga naga paayo sang performance sang mga estudyante.

Santu kay Mayor Jon N. Aying, ini nga pagkilala nagapakita nga ang Munisipalidad sang Sara nagapadayon sa pagprioridad sang edukasyon bilang pundasyon sang progreso sang banwa. Ginpasalamatan man niya ang mga magturudlo, ginikanan, opisyales sang barangay, kag tanan nga partners nga nagbulig agud matuman ang handum nga mangin mas nami kag mas hapos ang edukasyon para sa mga kabataan.

Ang Seal of Good Education Governance nagarepresentar sang paghatag gahum sa lokal nga panguluhan agud matuman ang mga handom sang kabataang Pilipino—kag sa Sara, ini nga pangandoy padayon nga ginahimo nga realidad sang LGU-Sara kaupod ang sektor sang edukasyon kag religious.

SARA GUGMA KO!