May mga pamatuod na ang padayon nga suporta sang LGU Sara sa sektor sang agrikultura kag dunang manggad matapos ang duha ka adlaw nga inspeksyon sa mga tanuman sang cacao, lubi kag saging sang una nga batch sang mga benepisyaryo sang Agro-Forestry Project sa Sitio Bakahan, Brgy. Del Castillo; Sitio Lumatong, Brgy. Ardemil; kag Sitio Poste, Brgy. Muyco.
Sa pagpanguna ni Mayor Jon N. Aying, ginlibot ang nagkalain-lain nga mga tanuman agud masiguro ang maayo nga pagtubo sang mga pananom kag makita ang progreso sang proyekto nga ginpatigayon sang nagligad nga duha ka tuig.
Makalilipay nga nasaksihan sa inspeksyon nga madamo na sa mga puno sang cacao ang nagapamunga na, nagahatag sang paglaum sa mga mangunguma nga sa ulihi mangin dugang nga pangabuhian ang ila ginpangabudlayan.
Ang proyekto nagalakip sang pagtanom sa 130 ka ektarya nga duta sa kabukiran nga may 26,000 ka puno sang lubi, ginabanta nga 90,000 ka puno sang cacao, kag 30,000 ka puno sang saging. Luyag sini nga mapabakod ang produksyon sa agrikultura kaupod sang malungtaron kag maka-kalikasan nga pamaagi sa pagpanguma. Kabahin man sang inspeksyon ang pagpakig-angot sa mga benepisyaryo agud mahibaluan kag maalsyonan ang ila mga kinahanglanon.
Ginkumpirmar sang LGU Sara nga magapadayon ang paghatag sang abono, insecticides, kag compost nga halin sa Municipal Materials Recovery Facility (MRF) agud mas mapauswag pa ang pagtubo kag ani sang ila mga tanom.
Nagapakita ini nga ang padayon nga pagpamuhunan sang LGU Sara sa agrikultura kag kalikasan wala lamang nagatanom sang mga kahoy, kundi nagatanom man sang paglaum, malungtaron nga pangabuhian, kag mas mahamungayaon nga palaabuton para sa mga mangunguma sang banwa.
