EXECUTIVE ORDER NO. 013
Series sang 2026

ISA KA EXECUTIVE ORDER NGA NAGAHATAG SANG INTERIM NGA REGULASYON KAG PAGMONITOR SANG KATAASON SANG MGA TRUCK KAG BUG-AT SANG MGA SALAKYAN NGA NAGALABAY SA BANWA SANG SARA, ILOILO.

KON SA DIIN, bangud sa Republic Act No. 7160 ukon ginatawag nga Local Government Code of 1991, ilabi na sa Section 16 sini, ang Mayor sang Banwa ginahatagan sang gahum agud masiguro ang kaluwasan sang publiko, magmintinar sang seguridad kag maayo nga kahimtangan, kag magbantay sa pagpatuman sang mga layi sa trapiko sa sulod sang banwa;

KON SA DIIN, ang Republic Act No. 4136 (Land Transportation and Traffic Code), Section 9, nagapahayag nga wala sing bisan ano nga salakyan nga nagadalagan bilang isa ka yunit ang dapat maglab-ot sang sobra sa apat (4.0) ka metro nga kataason, nga amo ang nasyonal nga estandard para sa kataason sang mga salakyan;

KON SA DIIN, ang Banwa sang Sara may mga kalsada, tulay, linya sang kuryente, kag iban pa nga overhead nga instalasyon nga mahimo maapektuhan ukon maguba bangud sa paglabay sang mga truck kag bug-at nga salakyan nga sobra ang kataason;

KON SA DIIN, may mga insidente nga nagakatabo nga nagalakip sang mga matataas nga truck kag nagakalahulog nga karga sa dalan, pareho sang mga tubo, bangud sa sobra nga karga, nga nagahatag sang katalagman sa kaluwasan sang publiko, dalagan sang trapiko, kag nagadala sang kalalat-an sa mga propiedad sang gobyerno, nga nagakinahanglan sang gilayon nga pagtapna kag regulated nga tikang;

KON SA DIIN, ang Sangguniang Bayan sa karon nagatan-aw kag nagadumdom sang pagpatuman sang isa ka ordinansa nahanungod sa takos sang mga truck, lakip na ang limitasyon sa kataason, kag may kinahanglanon para sa isa ka pauna nga pagsulondan agud magiyahan ang pagpatuman sang trapiko samtang ginahulat ang pag-aprubar sini;

KARON, GANI, ako, si JON N. AYING, Mayor sang Banwa sang Sara, paagi sa mga gahum nga ginhatag sa akon sang layi, nagapahayag sini nga:

Section 1. KATUYUAN.

Ini nga Executive Order ginpagwa bilang pauna kag pagtapna nga tikang sa regulasyon sang trapiko agud magiyahan ang Philippine National Police (PNP) kag ang mga lokal nga traffic enforcers sa pagmonitor kag pagdumala sang paglabay sang mga truck nga sobra ang kataason kag sobra ang karga sa sulod sang Banwa sang Sara, samtang wala pa mapatuman ang nagakaangay nga ordinansa sang banwa.

Section 2. PAUNA NGA GIYA SA KATAASON.

Bilang pauna nga estandard, ang mga truck kag mabug-at nga salakyan nga nagalabay sa mga kalsada sang banwa indi dapat maglab-ot sang sobra sa 4.0 ka metros nga kabug-osan nga kataason, suno sa Section 9 sang RA 4136 (Land Transportation and Traffic Code) kag sa mga nasyonal nga estandard sa kaluwasan sang dalan. Ang mga driver sang mga salakyan nga nagalapas sini nga kataason mahimo pahibaluan nga mag-agi sa lain nga dalan, magbuhin sang karga, ukon maghulat sang nagakaigo nga clearance agud masiguro ang kaluwasan sang publiko.

Section 3. REGULASYON SANG TRAPIKO.

• Ang PNP-Sara kag ang lokal nga Traffic Management Unit ginamadoan nga magmonitor, magpasunod, kag kon ano ang kinahanglan, para sa kaluwasan sang publiko.

Section 4. KOORDINASYON KAG IMPORMASYON.

Ang Municipal Engineering Office, sa koordinasyon sa Traffic Management Unit kag sa PNP, magabulig sa pag-identificar sang mga kritikal nga lugar, pag-instalar sang temporaryo nga mga warning signage, kag sa pagpalapnag sang impormasyon sa mga operator sang transportasyon kag mga driver.

Section 5. TAGDUGAY.

Ini nga Executive Order magapadayon nga mangin epektibo tubtob nga maaprubahan kag mangin epektibo ang ordinansa sang banwa nahanungod sa regulasyon sang kataason kag sobra nga karga sang mga truck, gawas kon ini bag-uhon ukon bawi-on antes sini.

SARA GUGMA KO!