Isa ka kadalag-an ang naangkon sang Sara Municipal Police Station (Sara MPS) matapos ini nga napasar ang Revalida para sa Proficiency Stage sang PNP P.A.T.R.O.L. Plan 2030 nga ginhiwat sang Agosto 7, 2026 sa Iloilo Police Provincial Office (IPPO) Headquarters.
Ang ini nga achievement nagapakita sang nagataas nga kapasidad sang Sara MPS sa strategic governance, institutionalized management kag pagpatuman sang mga programa nga nagasuporta sa mas epektibo kag episyente nga pagserbisyo sa komunidad.
Sa evaluation, gin-updan kag ginrepresentar sang Sara Municipal Advisory Group for Police Transformation and Development (Sara MAG-PTD) nga ginapangunahan ni Hon. Vice Mayor Ryan S. Zerrudo, nga aktibo nga nagahatag sang advisory support kag nagabulig sa pagpalig-on sang police transformation initiatives sang estasyon.
Daku man ang kontribusyon sang Local Government Unit (LGU) of Sara, sa pagpamuno ni Mayor Jon N. Aying, upod ang nagkalain-lain nga community stakeholders nga naghatag sang kinahanglanon nga logistical, infrastructure kag policy support, advisory oversight, kag pagpalig-on sang grassroots partnerships.
Ang ini nga lihok nagapakita nga ang epektibo nga pagmintinar sang kalinong, kahilwayan kag seguridad indi lamang responsibilidad sang kapulisan, kundi isa ka kolektibo nga pagpaninguha sang lokal nga panguluhan, law enforcement agencies kag komunidad.
Isa ini ka kadalag-an sang Sara Municipal Police Station, LGU-Sara kag mga Saranhon nga nagahili-usa para sa malinong kag mainuswagon nga banwa.
SARA GUGMA KO!
