Ginpakita ni Mayor Jon N. Aying ang iya padayon nga suporta sa edukasyon samtang nagtambong sa ISIP Pasidungog 2026 sang Iskolar Sang Iloilo Program (ISIP) Batch 27, nga ginhiwat sang Hulyo 29, 2026 sa Grand Xing Imperial Hotel, Iloilo City.
Ang programa nagpasidungog sa mga nagtapos nga iskolar sang probinsya nga nagpakita sang mataas nga dedikasyon kag kahamungayaan sa ila pagtuon.
Sa programa, kaupod si Mayor Aying sa pagpanagtag sang mga sertipiko, medalya kag cash incentives sa tatlo ka iskolar halin sa Banwa sang Sara nga madinalag-on nga nagtapos sa ila tagsa ka kurso. Ginkilala sanday Jorge Hermogenes Jr.(Cum Laude – BS Community Development), Marvin Marbella (Graduate – BS Civil Engineering), kag Coney Jean Marie Romaldon (Cum Laude – BS Entrepreneurship). Ini nga pagkilala nagapamatuod sang ila pagpaninguha kag dedikasyon sa pag-angkon sang de-kalidad nga edukasyon.
Ginpabutyag man ni Mayor Aying ang iya pagdayaw sa mga ginpasidunggan nga iskolar kag gin-encourage sila nga padayon nga gamiton ang ila ihibalo agud mangin instrumento sang pag-uswag sang Banwa sang Sara kag sang bug-os nga Probinsya sang Iloilo. Ang ila kalampusan isa ka inspirasyon sa mga kabataan nga mangin mapisan sa pagtuon kag mangin kabahin sang mas maayong palaabuton para sa komunidad.
