Naghiliusa ang mga miyembro sang Association of Barangay Kagawad (ABAKA) sang Banwa sang Sara sa pagpatigayon sang isa ka Tree Planting Activity subong nga adlaw (Hunyo 5, 2026) sa Sitio Kampitan, Barangay Tady, Sara, Iloilo bilang kabahin sang selebrasyon sang 25th Sulay Basya Festival.
Ginpatigayon ang aktibidad sa tema nga “Kakahuyan kag Tubig sang Kabuhi – Sulay Basya 2026”, nga nagapakita sang importansya sang pag-amlig sa aton kalikupan, labi na sa mga lubi kag tinubdan sang tubig nga nagahatag kabuhi sa komunidad.
Sa sini nga inisyatibo, nagtiniripon ang mga barangay kagawad, lokal nga opisyal sa pagpanguna ni Mayor Jon N. Aying kag Vice Mayor Ryan S. Zerrudo, mga opisyales sang Barangay Tady, kag iban pa nga mga boluntaryo agud magtanom sang mga lubi sa lugar nga ginpili para sa reforestation kag pagpreserbar sang kalikupan.
Ang programa nagatuyo nga mapabakod ang kampanya kontra pagkalbo sang kagulangan kag mapadayon ang proteksyon sang mga watershed area sa banwa. Subong man, agud mapadamo pa gid ang mga lubi sa aton banwa nga daku gid ang bulig para sa dugang nga palangitan-an sang aton mga mangunguma.
Suno sa mga opisyal sang ABAKA, ang tree planting activity indi lamang simbolo sang paghiliusa kundi isa man ka konkreto nga tikang agud masiguro ang mas matahum kag mas berde nga palaabuton para sa masunod nga henerasyon.
Ang ini nga aktibidad nagapamatuod nga pinaagi sa pagbinuligay kag responsable nga pag-atipan sang kinaiyahan, mahimo naton mapreserbar ang “kakahuyan kag tubig sang kabuhi” nga mangin pundasyon sang malungtaron nga kauswagan sang Banwa sang Sara.
