Isa na naman ka makasaysayan nga kadalag-an para sa sektor sang ikaayong-lawas sa banwa sang Sara matapos opisyal nga ginbuksan kag ginlunsar sang Lokal nga Panguluhan sang Sara ang PhilHealth GAMOT Pharmacy sang Martes, Hunyo 9, 2026.
Ang nasambit nga pasilidad amu ang una nga LGU-owned GAMOT-accredited Pharmacy sa bug-os nga Probinsya sang Iloilo, nga nagapakita sang padayon nga pagpaninguha sang Lokal nga Gobyerno sa paghatag sang mas epektibo, mas accessible, kag mas mapuslanon nga serbisyo sa panglawas para sa katawhan ilabi na gid sa Saranhon.
Paagi sa ini nga programa, mas mapahapos ang pag-angkon sang mga kinahanglanon nga bulong sang mga residente, labi na sang mga miyembro sang PhilHealth nga kwalipikado sa GAMOT Package.
Ginapaabot nga makabulig ini sa paghagan-hagan sang gasto sang mga pamilya sa pagbakal sang medisina kag sa pagpaayo sang ila kahimtangan sa panglawas.
Suno sa LGU, ang pagbukas sang PhilHealth GAMOT Pharmacy kabahin sang mas daku nga tikang sang administrasyon sa pagpalapnag sang kalidad nga healthcare services kag sa pagsiguro nga ang mga Saranhon may yara sang mas madali nga akses sa mga serbisyo kag benepisyo sang gobyerno.
Madumduman nga sang Abril 22, 2026, opisyal nga gin-accredit ang Sara Municipal Pharmacy bilang provider sang PhilHealth GAMOT Package, nga naghatag sini sang pagkilala bilang una nga LGU-owned GAMOT provider sa probinsya.
Ang ini nga inisyatibo nagapakita sang padayon nga dedikasyon sang LGU Sara sa pagpabakod sang programa sa panglawas kag sa pagserbisyo sang may gugma kag kabalaka para sa kaayuhan sang tagsa ka Saranhon.
