Napun-an sang kalipay kag pagdayaw ang ginhiwat nga Sulay Basya Cup Awarding Night sang Nobyembre 21, 2026 sa Sara Activity Center, bilang pagkilala sa mga atleta, koponan, kag mga distrito kag barangay nga nagpakita sang talento, disiplina, kag sportsmanship sa lain-lain nga kompetisyon sang Sulay Basya Cup.
Sa 31 Up Inter-District Basketball, ginkoronahan bilang kampeon ang District 9, samtang nag-angkon sang 1st Runner-Up ang District 1, 2nd Runner-Up ang District 8, kag 3rd Runner-Up ang District 7.
Sa Inter-District Volleyball Women, gin-angkon sang District 6 ang kampyonato, ginsundan sang District 9 bilang 1st Runner-Up, District 8 bilang 2nd Runner-Up, kag District 2 bilang 3rd Runner-Up.
Nagdominar naman ang District 2 sa Inter-District Volleyball Men, nga nag-angkon sang kampeonato, samtang nagkuha sang 1st Runner-Up ang District 6, 2nd Runner-Up ang District 9, kag 3rd Runner-Up ang District 8.
Sa 30 Under Inter-Barangay Basketball, ginproklamar nga kampeon ang Poblacion Ilawod, samtang nag-angkon sang 1st Runner-Up ang Poblacion Ilaya, 2nd Runner-Up ang Anoring, kag 3rd Runner-Up ang Salcedo.
Ang awarding ceremony nagserbe bilang pagkilala sa dedikasyon kag pagpangabudlay sang mga atleta kag opisyales nga nangin kabahin sang Sulay Basya Cup. Nagpahayag man sang pagpasalamat ang lokal nga panguluhan sa padayon nga suporta sang mga distrito, barangay, coaches, kag mga manugpalakpak nga nangin kabahin sang kalampusan sang torneo.
Gin-organisar ini sang Sara Municipal SK Federation sa pagpanguna ni SK President; Hon. Brix Bondoc, kaupod ang LGU-Sara, barangay officials sang 42 ka barangay kag iban pa.
Ang Sulay Basya Cup nagapadayon nga nagapalig-on sang pagkakaisa, camaraderie, kag sports development sa banwa sang Sara, samtang nagahatag sang higayon sa mga Saranhon nga mapakita ang ila talento sa sports kag mapalapnag ang diwa sang malipayon kag matinlo nga kompetisyon.