Nagtililipon ang mga esports enthusiasts kag MLBB players gikan sa nagkalain-lain nga barangay kag banwa sa ika-5 nga Distrito sang Iloilo para sa Sambuwa sa Sara 2026 Inter-Barangay 5th District MLBB Tournament nga ginhiwat sang Hunyo 19, 2026 bilang kabahin sang pagsaulog sang 25th Sulay Basya Festival 2026.
Nagpakita sang mataas nga lebel sang kahanas, estratehiya kag pagbinuligay ang mga nagpartisipar nga koponan sa bug-os nga torneo.
Sa katapusan sang kompetisyon, nag-angkon sang kampeonato ang Poblacion Carles, samtang Poblacion Ilaya, Sara ang nagkuha sang 1st Runner-Up kag Barangay Aspera, Sara ang nag-angkon sang 2nd Runner-Up.
Ang nasambit nga torneo nagtinguha sa paghatag sang positibo nga platform para sa kabataan kag sa pagpalig-on sang camaraderie, sportsmanship kag healthy competition pinaagi sa e-sports.
Ini nga kalihukan ginhiwat sa pagpanguna sang LGU-Sara sa pamuno ni Mayor Jon N. Aying kag Vice Mayor Ryan S. Zerrudo, upod ang mga miyembro sang Sangguniang Bayan. Daku man ang nangin papel sang Sambuwa Sara Committee nga ginapamunuan nila Ms. Carmela Joy Marie B. Perjes kag Ms. Raquel Bataanon, kaupod si Ms. Chantelle Marie Santillan, Sambuwa sa Sara Event Organizer, kag Mr. Karl Parcon, lakip ang iban pa nga mga indibidwal nga naghatag sang suporta para sa madinalag-on nga pagpatigayon sang amo nga aktibidad.
Ang Sambuwa sa Sara 2026 padayon nga nagahatag sang mga kalihukan nga nagapalig-on sang talento, pagkakaisa kag partisipasyon sang kabataan bilang kabahin sang masadya nga pagsaulog sang 25th Sulay Basya Festival 2026.