Nagpatigayon ang Sara Rural Health Unit (RHU) sang Active Case Finding pinaagi sa Libre nga Chest X-Ray sang nagligad nga Mayo 21, 2026, bilang kabahin sang padayon nga kampanya kontra tuberculosis (TB) kag sa pagpalig-on sang serbisyo panglawas para sa mga pumuluyo sang banwa sang Sara.
Ang ini nga inisyatibo ginpangunahan ni Dr. Jimmily Aguiling, upod kay Dr. Rhodora Conz-Leap Global, sa pagbulig kag suporta sang United States Department of State kag sang Philippine Tuberculosis Society, Inc. (PTSI).
Kabahin man sang nagbuligay sa nasambit nga aktibidad amo sanday Ms. Rizza Coprada, M&E Consultant sang PTSI; Mr. Aaron Moses Masangakay, M&E Assistant; Ms. Charity Perea, Branch Manager; kag ang bug-os nga pwersa sang Sara RHU Staff nga nagserbisyo agud mangin madinalag-on ang programa.
Sa kabug-usan, 155 ka mga indibidwal ang na-screen kag na-X-ray, nga naghatag sang higayon sa temprano nga pagkilala kag pagmonitor sang posible nga kaso sang tuberculosis. Pinaagi sini, mas mapadasig ang paghatag sang nagakaigo nga bulong kag pag-atipan sa mga apektado sang masakit.
Ang amo nga tikang nagapamatuod sang padayon nga paninguha sang lokal nga panguluhan kag sang sektor sang panglawas sa paglikaw kag pagkontrol sang tuberculosis para sa mas himsog nga banwa sang Sara.
